అలంపూర్ పుణ్య క్షేత్రం

Jogulabatemole1‘‘బ్రహ్మేశోయం సవిశ్వేశః సకాశి హేమలాపురి,
సాగంగా తుంగభద్రేయం సత్యమేవం నవంశయః’’

రాష్ట్రంలో చారిత్రకంగా ప్రసిద్ది చెందిన శైవ క్షేత్రాల్లో తెలంగాణలోని అలంపూర్‌కు ప్రత్యేక స్థానం ఉంది. దక్షిణ కాశీగా, శ్రీశైలానికి పశ్చిమ ధ్వారంగా వెలుగొందుతున్న ఈ పుణ్యక్షేత్రంలో ప్రధాన దేవి దేవతలు శ్రీ బాలబ్రహ్మేశ్వరుడు, జోగుళాంబ అమ్మవారు. దేశంలోని అష్టాదశ శక్తిపీఠాలలో అయిదవ శక్తిపీఠంగా విరాజిల్లుతున్న ఈ క్షేత్రంలో బ్రహ్మకు తొమ్మిది ఆలయాలు ఉండడం విశేషం. ఇంతటి ప్రసిద్ది చెందిన ఈ క్షేత్రాన్ని దర్శించుకునేందుకు దేశం నలుమూలల నుంచే కాక విదేశాల నుంచి కూడా యాత్రికులు వస్తుంటారు. చారిత్రకంగా ఈ ఆలయాన్ని 6వ శతాబ్దానికి చెందిన బాదామిచాళుక్య వంశంలోని రెండవ పులకేశి నిర్మించినట్లు ఇక్కడి శాసనాల ద్వారా తెలుస్తోంది. అలంపూర్‌కు పూర్వనామం హేమలాపురం. కాలక్రమేణ ఈ నామం రూపాంతరం చెందుతూ హతంపురం, యోగులాపురం, జోగుళాపురం, అలంపురంగా రూపాంతరం చెందింది.