Press notes

Service camps

Indhrakaran Reddy

కృష్ణ తీర్థం

అశేషంగా భక్తులు.. విశేషంగా పూజలు.. పిండ ప్రదానాలు, పుష్కర పుణ్య స్నానాలు.. వెరసి కృష్ణమ్మ ఒడిలో ఆధ్యాత్మికత వెల్లివిరుస్తోంది. నదీ తీరంలోని ఆలయాలన్నీ భక్తులతో కిటకిటలాడుతున్నాయి. ప్రధాన ఘాట్లకు ఉదయం నుంచే భక్తుల రద్దీ పారంభం కాగా.. నాగార్జునసాగర్, వాడపల్లి, మట్టపల్లి, మహంకాళిగూడెం భక్తజనంతో కిక్కిరిసిపోతున్నాయి. ఆరో రోజు జిల్లా అంతటా సుమారు .5లక్షల మంది పుష్కర స్నానాలు చేయగా.. అత్యధికంగా వాడపల్లిలో 90వేల మంది పాల్గొన్నారు. గవర్నర్ నరసింహన్ ఈ నెల 19నే మట్టపల్లిలో పుష్కరస్నానం చేయనున్నారు.

పుష్కర వేడుకల్లో పాల్గొనేందుకు రాష్ట్ర గవర్నర్ ఈఎస్‌ఎల్ నరసింహన్ ఈనెల 20న జిల్లాకు వస్తారని అనుకోగా.. ఆయన యాత్ర ఒకరోజు ముందుకు మారింది. మట్టపల్లిలోని లక్ష్మీనరసింహ స్వామి ఆలయం వద్ద ఉన్న పుష్కర ఘాట్‌లో ఈ నెల 19న గవర్నర్ కుటుంబ సభ్యులతో కలిసి పుష్కర స్నానం చేయనున్నారు. ఈ రోజు రాత్రికే గవర్నర్ నరసింహన్ మట్టపల్లికి చేరుకుని.. రేపు తెల్లవారుజామున పుష్కర స్నానం ఆచరించే అవకాశం ఉంది.

ఆరో రోజూ పుష్కర ఘాట్లకు భక్త జనులు క్యూ కట్టారు. పవిత్ర కృష్ణా నదిలో స్నానాల కోసం బారులు తీరారు. ఉదయం నుంచే భక్తుల రాక ప్రారంభం కాగా.. మధ్యాహ్నం తర్వాత ఆ సంఖ్య భారీగా పెరిగింది. సాయంత్రం నాలుగు గంటల వరకూ జిల్లాలోని ప్రధాన పుష్కర ఘాట్లు భక్తుల రద్దీతో కిటకిటలాడాయి. ఆ తర్వాత క్రమంగా భక్తుల రాక తగ్గు ముఖం పట్టింది. అశేషంగా తరలి వచ్చిన భక్త జనులతో ఘాట్లన్నీ పుష్కర స్నానాలు, పిండ ప్రదానాలతో దర్శనమిచ్చాయి. జిల్లా వ్యాప్తంగా ఉన్న అన్ని ఘాట్లలో కలుపుకొని ఆరోరోజు సుమారు 2.5లక్షల మంది భక్తులు పుణ్యస్నానం చేశారు.

ప్రధాన ఘాట్లకు కొనసాగిన భక్తుల రద్దీ…
బుధవారం దామరచర్ల మండలం వాడపల్లి వద్ద భక్తుల రద్దీ ఎక్కువగా కనిపించింది. ఇక్కడి శివాలయం ఘాట్‌లో ఎక్కువ మంది భక్తులు పుష్కర స్నానాలు చేయగా.. దామరచర్ల మండలంలోని 11ఘాట్లలో మొత్తం 90వేల మంది భక్తులు పుష్కర వేడుకల్లో పాల్గొన్నారు. నాగార్జునసాగర్‌లోనూ శివాలయం ఘాట్‌లోనే ఎక్కువ మంది భక్తులు పుష్కర వేడుకలకు హాజరు కాగా.. మొత్తం పెద్దవూర మండలంలోని నాలుగు ఘాట్లలో కలుపుకుని సుమారు 80వేల మంది భక్తులు స్నానాలు చేశారు. మట్టపల్లిలోని ఘాట్లలో 40వేల మంది, నేరేడుచర్ల మండలం మహంకాళిగూడెంలో 13వేల మంది భక్తులు పాల్గొన్నారు.

మేళ్లచెర్వు మండలంలోని వజినేపల్లి, కిష్టాపురం, బుగ్గమాదారం ఘాట్లలో 6వేల మంది భక్తులు పుష్కర స్నానాలు చేశారు. చందంపేట మండలం కాచరాజుపల్లిలో భక్తులను నదీ జలాల చెంతకు అనుమతించడంతో భక్తుల సంఖ్య కొంత పెరిగింది. ఇక్కడ బుధవారం సుమారు 2వేల మంది పుష్కర స్నానాలు చేశారు. పెద్దమునిగల్‌తోపాటు అజ్మాపురం, పానగల్, దర్వేశిపురం ఘాట్లు కూడా భక్తుల పుణ్య స్నానాలతో పరవశించాయి.

ప్రముఖుల పుణ్య స్నానాలు…
జిల్లా వ్యాప్తంగా ఉన్న ఘాట్లలో బుధవారం పలువురు ప్రముఖులు పుష్కర స్నానాలు, పిండ ప్రదానాలు చేశారు. లోకాయుక్త ఆనందరెడ్డి కుటుంబ సమేతంగా వాడపల్లి శివాలయం ఘాట్‌లో పెద్దలకు శ్రాద్ధకర్మలు నిర్వహించిన అనంతరం నదిలో పుష్కర స్నానం చేశారు. మెట్రో ఇండియా పత్రిక చైర్మన్, మేనేజింగ్ డైరెక్టర్ సీఎల్ రాజం కుటుంబ సమేతంగా మట్టపల్లిలోని వీఐపీ ఘాట్‌లో పుష్కర స్నానం చేసి లక్ష్మీనరసింహ స్వామిని దర్శించుకున్నారు. సినీ నటుడు వేణు మాధవ్ కూడా మట్టపల్లి వీఐపీ ఘాట్‌లో పుష్కర స్నానం చేశారు. మల్కాజ్‌గిరి ఎంపీ నల్ల మల్లారెడ్డి నాగార్జున సాగర్‌లోని శివాలయం ఘాట్‌లో నదీ జలాలకు పూజలు చేసి పుష్కర స్నానం ఆచరించారు.

తన విద్యా సంస్థల్లో చదువుతున్న 1200మంది విద్యార్థులతో కలిసి వచ్చి మల్లారెడ్డి సాగర్‌లో పుష్కర స్నానం చేశారు. కాచరాజుపల్లిలో భక్తులను నదీ జలాల చెంతకు అనుమతించిన చోట జిల్లా పరిషత్ చైర్మన్ బాలూ నాయక్, దేవరకొండ ఎమ్మెల్యే రవీందర్ కుమార్‌లు వేర్వేరుగా పుష్కర స్నానం చేశారు. దామరచర్ల మండలం అడవిదేవులపల్లిలో ఎమ్మెల్సీ పూల రవీందర్ కుటుంబ సమేతంగా పుష్కరస్నానం చేసిన తర్వాత శివపంచాయతనంలో దైవ దర్శనం చేసుకున్నారు. ఇంకా పలువురు ప్రముఖులు వివిధ ఘాట్లలో పుష్కర స్నానాలు ఆచరించారు.

వాడపల్లిలో అంగరంగ వైభవంగా నదీ హారతి…
పుష్కరాల్లో 12రోజుల పాటు ప్రతీ రోజు కృష్ణా నదికి సమర్పించే హారతి కార్యక్రమం జిల్లా వ్యాప్తంగా కన్నుల పండువగా కొనసాగుతోంది. ముఖ్యంగా వాడపల్లిలో రెండు రోజులుగా ఈ కార్యక్రమం అత్యంత రమణీయంగా నిర్వహిస్తున్నారు. పూలతో అలంకరించిన తోరణాల కిందుగా భక్త జన సందోహం మధ్య అంగరంగ వైభవంగా నిర్వహించిన బుధవారం నాటి హారతి కార్యక్రమానికి పెద్ద సంఖ్యలో భక్తులు హాజరయ్యారు. మట్టపల్లి, నాగార్జునసాగర్, మహంకాళిగూడెంలోనూ నదికి హారతి వైభవోపేతంగా నిర్వహించారు. సాయంత్రం వేళ సాగర్, వాడపల్లి, మట్టపల్లి ఘాట్ల వద్ద నిర్వహించిన సాంస్కృతిక కార్యక్రమాలు భక్తలోకాన్ని అలరించాయి.
-ఆరో రోజూ పుష్కర ఘాట్లకు భారీగా భక్తజనులు
-కృష్ణా తీరంలో వెల్లివిరుస్తున్న ఆధ్యాత్మికత
-జిల్లా అంతటా 2.5లక్షల మంది హాజరు
-మట్టపల్లికి గవర్నర్ నరసింహన్ రాక రేపే…

Source:http://www.namasthetelangaana.com/Districts/Nalgonda/%E0%B0%95%E0%B1%83%E0%B0%B7%E0%B1%8D%E0%B0%A3-%E0%B0%A4%E0%B1%80%E0%B0%B0%E0%B1%8D%E0%B0%A5%E0%B0%82-22-598347.aspx

కృష్ణా తీరంలో.. జనకళ!

-పుణ్యస్నానమాచరించిన11 లక్షల మంది..
-ఆరో రోజు భారీగా భక్తులు..
-అలంపూర్, సోమశిలలో సీఎం కేసీఆర్ వియ్యంకులు హరినాథరావు, కిషన్‌రావు పుష్కరస్నానం..
-నదీఅగ్రహారంలో సినీ నిర్మాతలు బెల్లంకొండ, వెంకట్రాంరెడ్డి..
-రంగాపూర్‌లో నిరంజన్‌రెడ్డి మాతృమూర్తి తారకమ్మ..
-ఏర్పాట్లను పరిశీలించిన మంత్రులు జూపల్లి కృష్ణారావు, లకా్ష్మరెడ్డి..
మహబూబ్‌నగర్, నమస్తే తెలంగాణ ప్రతినిధి :కృష్ణా పుష్కరాలు వైభవంగా కొనసాగుతున్నాయి. జిల్లాలోని ప్రధానఘాట్లన్నీ భక్తులతో కళకళలాడుతున్నాయి. బుధవారం జిల్లా వ్యాప్తంగా 11లక్షల 60వేల మంది భక్తులు పుణ్యస్నాన మాచరించినట్లు అంచనా. అలంపూర్ గొందిమళ్ల ఘాట్‌లో మంత్రి కేటీఆర్ బంధువులు, మంత్రి మామ హరినాథరావు ఆధ్వర్యంలో స్నానమాచరించి జోగుళాంబను దర్శించుకున్నారు. సోమశిల ఘాట్‌లో సీఎం కేసీఆర్ వియ్యంకుడు కిషన్‌రావు (ఎంపీ కవిత మామ)నదిలో స్నానమాచరించారు. రంగాపూర్ ఘాట్‌లో ప్రణాళికా సంఘం ఉపాధ్యక్షుడు నిరంజన్‌రెడ్డి మాతృమూర్తి తారకమ్మ (102) పుష్కరస్నానమాచరించారు.

గద్వాల నదీఅగ్రహారంలో సినీ నిర్మాతలు బెల్లంకొండ సురేష్, వెంకట్రాంరెడ్డిలు పుష్కర స్నానం చేశారు. సోమశిలలో ఏర్పాట్లపై మంత్రి జూపల్లి కృష్ణారావు పర్యవేక్షించారు. ప్రణాళికా సంఘం ఉపాధ్యక్షుడు నిరంజన్‌రెడ్డి, ఎమ్మెల్యేలు ఆల వెంకటేశ్వర్‌రెడ్డి రంగాపూర్ ఘాట్‌లో, పస్పుల ఘాట్‌లో ఎమ్మెల్యే చిట్టెం రాంమోహన్‌రెడ్డిలు పర్యవేక్షించారు. అలంపూర్‌లో కలెక్టర్ శ్రీదేవి, ఎస్పీ రెమా రాజేశ్వరిలు పుష్కర నిర్వహణను పరిశీలించారు. పుష్కరఘాట్లలో భక్తుల కోసం ఏర్పాటు చేసిన సాంస్కృతిక కార్యక్రమాలను ఉత్తేజపరుస్తున్నాయి.

Source:http://www.namasthetelangaana.com/Districts/Mahboobnagar/%E0%B0%95%E0%B1%83%E0%B0%B7%E0%B1%8D%E0%B0%A3%E0%B0%BE-%E0%B0%A4%E0%B1%80%E0%B0%B0%E0%B0%82%E0%B0%B2%E0%B1%8B-%E0%B0%9C%E0%B0%A8%E0%B0%95%E0%B0%B3-20-598328.aspx

పుష్కరోత్సవం.. పుణ్యోత్సవం!

పుష్కర మహోత్సవం.. పుణ్యోత్సవంలా సాగుతున్నది. మంగళవారం దాదాపు ఎనిమిది లక్షలకు పైగా స్నానమాచరించారు. బీచుపల్లి, రంగాపూర్, సోమశిల, గొందిమళ్ల, నదీఅగ్రహారం, పస్పుల, క్రిష్ణా(మాగనూరు) ఘాట్లకు భక్తులు భారీగా తరలివచ్చారు. రంగాపురంలో మంత్రి మహేందర్‌రెడ్డి, జోగుళాంబ ఘాట్‌లో మంత్రి లకా్ష్మరెడ్డి, వరంగల్ కలెక్టర్ కరుణలు కుటుంబ సమేతంగా పుష్కరస్నానమాచరించారు. మంత్రి జూపల్లి, లకా్ష్మరెడ్డి, ప్రణాళికా సంఘం ఉపాధ్యక్షుడు నిరంజన్‌రెడ్డి, జడ్పీ చైర్మన్ బండారి భాస్కర్, కలెక్టర్ శ్రీదేవిలు పుష్కరఘాట్లను పరిశీలించారు. కృష్ణమ్మకు సంధ్యవేళ నదీహారతిలో నిరంజన్‌రెడ్డి పాల్గొన్నారు.

పాలమూరు జిల్లాలో పుష్కరస్నాన మహోత్సవం పండుగలా సాగుతున్నది. మంగళవారం లక్షలాది మంది భక్తజనం పుష్కరాల్లో పాల్గొన్నారు. ప్రధానఘాట్లలో భక్తులు యధావిధిగా పాల్గొని పుణ్యస్నానమాచరించారు. బీచుపల్లి, రంగాపూర్, సోమశిల, గొందిమళ్ల, నదీఅగ్రహారం, పస్పుల, క్రిష్ణా(మాగనూరు) ఘాట్లలో భక్తులు భారీగా వచ్చారు. రంగాపురంలో రాష్ట్ర రవాణ శాఖ మంత్రి మహేందర్‌రెడ్డి, జోగుళాంబ ఘాట్‌లో మంత్రి లకా్ష్మరెడ్డి, వరంగల్ కలెక్టర్ కరుణలు కుటుంబ సమేతంగా పాల్గొని స్నానమాచరించారు. అలాగే మంత్రి జూపల్లి, లకా్ష్మరెడ్డి, ప్రణాళికా సంఘం ఉపాధ్యక్షుడు నిరంజన్‌రెడ్డి, జడ్పీ చైర్మన్ బండారి భాస్కర్, కలెక్టర్ శ్రీదేవిలు పుష్కరఘాట్లను పరిశీలించారు.

5 వ రోజు 8 లక్షల మంది భక్తులు
జిల్లాలో సాగుతున్న పుష్కర వేడుకల్లో ఐదో రోజు 8 లక్షల మంది భక్తులు పాల్గొన్నట్లు అధికారుల అంచనా. ఇప్పటివరకు జిల్లాలో మొత్తంగా 50 లక్షల మంది పుష్కరస్నానమాచరించినట్లు కలెక్టర్ శ్రీదేవి తెలిపారు. జిల్లాలోని ప్రధానఘాట్లలో జన రద్దీ నెలకొంది.
-ఐదో రోజు 8 లక్షల మంది పుణ్యస్నానాలు..
-రంగాపుర్ ఘాట్‌లో మంత్రి మహేందర్‌రెడ్డి
-గొందిమళ్లలో వరంగల్ కలెక్టర్ కరుణ
-పర్యవేక్షించిన మంత్రులు జూపల్లి, లకా్ష్మరెడ్డి,
-ప్రణాళికా సంఘం ఉపాధ్యక్షుడు నిరంజన్‌రెడ్డి, జడ్పీ చైర్మన్ భాస్కర్
-ఇప్పటివరకు 50 లక్షల మంది పుష్కర స్నానం చేసినట్లు అంచనా..

Source:http://www.namasthetelangaana.com/Districts/Mahboobnagar/%E0%B0%AA%E0%B1%81%E0%B0%B7%E0%B1%8D%E0%B0%95%E0%B0%B0%E0%B1%8B%E0%B0%A4%E0%B1%8D%E0%B0%B8%E0%B0%B5%E0%B0%82-%E0%B0%AA%E0%B1%81%E0%B0%A3%E0%B1%8D%E0%B0%AF%E0%B1%8B%E0%B0%A4%E0%B1%8D%E0%B0%B8%E0%B0%B5%E0%B0%82-20-598068.aspx

పుష్కర ఏర్పాట్లు సూపర్

-కేసీఆర్ బాగ చేస్తుండు..
-పుష్కర ఏర్పాట్లపై భక్తుల సంతృప్తి
-ట్రాఫిక్ క్రమబద్దీకరణ భేష్…
-ప్రభుత్వానికి వీఐపీల ప్రశంసలు..
మహబూబ్‌నగర్, నమస్తే తెలంగాణ : హలో..పుష్కరాలకొచ్చినం…నదిలో నీళ్లూ బాగున్నయ్, స్నానాలు చేసినం, ఇగో గిప్పుడే దేవుళ్ల దర్శనం కూడా అయ్యింది.. సత్రంలో భోజనానికి వెళుతున్నం.. బస్సులు గూడ వెంట వెంటనే వస్తున్నయ్, భక్తులు మస్తుగనే ఉన్నరు గానీ ఎలాంటి ఇబ్బందులు లేవు. కేసీఆర్ బాగచేసిండు, పాలమూరు జిల్లాల ఏర్పాట్లు చాలా బాగున్నయ్, మీరెప్పుడొస్తరు, రండి… పన్నెండేండ్లకోసారి వచ్చి చూసిపోవచ్చుకదా..? ఇవీ వివిధ ప్రదేశాల నుంచి పాలమూరు జిల్లాలోని పుష్కరఘాట్లకు వచ్చిన భక్తులు వారి సమీప బంధువులతో ఫోన్‌లో చేసిన సంభాషణలు.

నిజమే..సమైక్య రాష్ట్రంలో 2004లో జరిగిన కృష్ణా పుష్కరాలకు, తెలంగాణ రా ష్ట్రం ఏర్పడ్డాక తొలిసారి జరుగుతున్న కృష్ణా పుష్కరాలకు ఉన్న తేడాలేమిటో భక్తులు గమనిస్తున్నారనడానికి ఫోన్ సంభాషణలే చక్కని నిదర్శనంగా చెప్పవచ్చు. కేవలం తెలంగాణలోని వివిధ జిల్లాలకు చెందిన భక్తులమాటలే కావు, ఆంధ్రప్రదేశ్, కర్నాటక, మహారాష్ట్ర నుంచి వచ్చిన భక్తులు సైతం పుష్కర ఏర్పాట్లను చూసి ప్రభుత్వాన్ని, అధికారులను ఈ తీరును అభినందిస్తున్నారు. పాలమూరు జిల్లాలోని మొత్తం 52 పుష్కర ఘాట్లవద్ద ఆయా శాఖల అధికారులు చేసిన ఏర్పాట్లపై భక్తులతోపాటు వీఐపీలు సైతం ప్రశంసలు కురిపిస్తున్నారు. సినిమా హీరో శ్రీకాంత్ రంగాపూర్ వీఐపీ ఘాట్ వద్ద పుష్కరస్నానం చేశాక మీడియాతోపాటు మాట్లాడుతూ తాను హైదరాబాద్‌నుంచి రంగాపూర్ ఘాట్ వరకు రోడ్డుపై ఎలాంటి ఆటంకాలు లేకుం డా ప్రయాణించానని, అధికారులు చక్కటి ఏర్పాట్లు చేశారన్నారు. పుష్కర భక్తులకు ఇబ్బందులు కలగకుండా అవసరమైన ఏర్పాట్లు చేసిన ముఖ్యమంత్రి కేసీఆర్‌కు ఆయన అభినందనలు తెలిపారు.

ఖర్చు ఎంతయితేనేం..ఏర్పాట్లు అదుర్స్..
తెలంగాణ రాష్ట్రం ఏర్పడ్డాక గత సంవత్సరం జరిగిన గోదావరి పుష్కరాలలో భక్తుల సౌకర్యం కోసం తెలంగాణ రాష్ట్ర ప్ర భుత్వం ఎన్ని ఏర్పాట్లు చేసిందో అంతకు మించిన ఏర్పాట్లను ప్రస్తుత కృష్ణా పుష్కరాలలో ప్రభుత్వం నిర్వహిస్తోంది. దేశవ్యాప్తంగా ఏ నదికి పుష్కరమొచ్చినా భక్తులకు తగిన సౌకర్యాలు క ల్పించడంలో ఆయా రాష్ట్ర ప్రభుత్వాలు ఖర్చుకు వెనకాడిన సం దర్భాలు ఉన్నాయి. తెలంగాణ రాష్ట్రంలోని పాలమూరు, న ల్గొండ జిల్లాల్లో మాత్ర మే కృష్ణా పరీవాహక ప్రదేశం ఉండగా ప్రభుత్వం రూ.212 కోట్లతో పాలమూరులో 52, నల్గొండలో 29 చొప్పున పుష్కరఘాట్లను నిర్మించింది.

రాష్ట్ర వ్యాప్తంగా వివిధ జిల్లాలనుంచి వచ్చే భక్తులతోపాటు పొరుగు రాష్ర్టాలనుం చి వచ్చే భక్తుల సంఖ్యను అంచనా వేసి తెలంగాణ ప్రభుత్వం పూర్తిస్థాయి ఏర్పాట్లు చేసింది. జాతీయ రహదారితోపాటు అంతరాష్ట్ర రహదారులకు అవసరమైన ప్యాచ్‌వర్క్‌లు నిర్వహించడం, పుష్కరాలకు 6నెలల ముందునుంచే హైవేకు, అంతరాష్ట్ర రహదారులకు అనుసంధానం చేస్తూ పుష్కర ఘాట్ల వరకు కొత్తరోడ్లు వేయడం, మరమ్మతులు నిర్వహించడంతో భక్తులు వివిధ క్షేత్రాలను దర్శించుకునేందుకు సానుకూల పరిస్థితి ఏర్పడింది. పుష్కరాలకు దూర ప్రదేశాల నుంచి పుష్కరాలకు బయలు దేరిన భక్తుల వాహనాల రాకపోకలకు ఎక్కడా ట్రాఫిక్ ఇబ్బందులు ఏర్పడకుండా పోలీసులు చేస్తున్న కృషిని ప్రత్యేకంగా అభినందిస్తున్నారు.

మహిళలు దుస్తులు మార్చుకునేందుకు గదులు ఏర్పా టు చే యడం, అల్లరి చేష్టలకు ఆ స్కారం లేకుండా షీటీంలు బందోబస్తు నిర్వహించడంతో భక్తులు ఆధ్యాత్మిక వాతావరణంలో పుష్కరస్నానం చేసి దైవదర్శనం చేసుకుంటున్నారు. జిల్లాలోని వివిధ ఘాట్లకు కొద్దిదూరంలోనే విశాల స్థలంలో పార్కింగ్ ఏర్పా టు చేయడం, పెద్ద వాహనాలకు ఒక వైపు, చిన్న వాహనాలకు మరో వైపు ఇలా క్రమపద్ధతిలో పార్కింగ్‌కోసం ఏర్పాట్లు చేయడంవల్ల వాహనాల రాకపోకలకు ఎలాంటి ఇబ్బందులు ఏర్పడటంలేదు. అదేవిధంగా పుష్కరఘాట్ల వద్ద ప్రమాదాలు జరుగకుండా పవర్‌బోట్ల ఏర్పాటు, అందుబాటులో గజ ఈతగాళ్లు, పోలీసు బందోబస్తు కారణంగా భక్తులు ఎలాంటి ఆందోళనకు గురికాకుండా పుణ్యస్నానాలు ఆచరిస్తున్నారు. నదీజలాల్లో స్నానం చేయడానికి భయపడేవారి కొందరు భక్తుల కోసం అధికారులు ప్రత్యేకంగా ఘాట్లవద్దే షవర్‌బాత్ పద్ధతి ఏర్పాటు చేశారు.

మరో వైపు మంత్రులు, ఎమ్మెల్యేలు, ఎమ్మెల్సీలు, ఎంపీ, టీఆర్‌ఎస్ నాయకులు తదితర స్థానిక ప్రజాప్రతినిధులు పుష్కరఘాట్లను తరచూ సందర్శిస్తూ ఏర్పాట్లను పరిశీలిస్తున్నారు. డీజీపీ, డీఐజీ, కమిషనర్, అడిషనల్ డీజీ తదితర పోలీసు ఉన్నతాధికారులతోపాటు కలెక్టర్, ఎస్పీ, డీఎస్‌పీ తదితర పోలీసు అధికారులు ఘాట్లను పరిశీలిస్తూ భద్రతా ఏర్పాట్లను ఎప్పటికప్పుడు సమీక్షిస్తున్నారు.
అలంపూర్‌లోని జోగుళాంబ, సోమశిల, బీచుపల్లి, రంగాపూర్, నదీ అగ్రహారం, పస్పుల ఘాట్లను భక్తులు అధిక సంఖ్య లో దర్శించుకొని పుణ్యస్నానాలు ఆచరించారు.

భక్తులు పుష్కర స్నానాలు చేసి ఆలయాల్లో పూజలు చేయడంతోపాటు పితృదేవతలకు పిండప్రదానం చేసి తర్పణాలు వదులుతున్నారు. బీచుపల్లి, రంగాపూర్, సోమశిల తదితర ఘాట్‌ల వద్ద టీఎస్‌ఆర్టీసీ బస్‌స్టేషన్‌ల ఏర్పాటు, భక్తుల రద్దీకి తగినట్లుగా బస్సుసర్వీసుల నిర్వహణ, అందుబాటులో రైళ్లు, ఘాట్ల వద్ద, దేవాలయాల వద్ద అపరిశుభ్ర వాతావరణం లేకుండా వ్యర్థాలను ఎప్పటికప్పుడు తొలగిస్తూ పారిశుధ్య నిర్వహణ, పోలీసు భద్రత, మంచినీటి వసతి, టాయ్‌లెట్లు తదితర ఏర్పాట్లు, వాటి నిర్వహణను వివిధ శాఖల అధికారులు పర్యవేక్షిస్తున్నారు. ఆలయాలవద్ద భక్తులు క్రమపద్ధతిలో దర్శించుకునేందుకు వీలుగా క్యూలైన్లు ఏర్పాటు చేశారు. సాంస్కృతిక శాఖ, జిల్లా సాంస్కృతిక మండలి ఆధ్వర్యంలో వివిధ ఘాట్ల వద్ద శాస్త్రీయ, జానపద నృత్యాలు, నాటకాలు తదితర కళాకారుల ప్రదర్శనలు భక్తులను అలరిస్తున్నాయి. వివిధ ఘాట్ల వద్ద ప్రతినిత్యం కృష్ణమ్మకు ఇచ్చే హారతి ప్రక్రియ భక్తులను ప్రత్యేకంగా ఆకట్టుకుంటుంది.

Source:http://www.namasthetelangaana.com/Districts/Mahboobnagar/%E0%B0%AA%E0%B1%81%E0%B0%B7%E0%B1%8D%E0%B0%95%E0%B0%B0-%E0%B0%8F%E0%B0%B0%E0%B1%8D%E0%B0%AA%E0%B0%BE%E0%B0%9F%E0%B1%8D%E0%B0%B2%E0%B1%81-%E0%B0%B8%E0%B1%82%E0%B0%AA%E0%B0%B0%E0%B1%8D-20-598067.aspx

కృష్ణవేణికి పంచహారతులు

కృష్ణాపుష్కరాల్లో భాగంగా మంగళవారం రాత్రి వాడపల్లి కృష్ణామూసీ నదుల సంగమం వద్ద పండితులు వేదమంత్రోచ్ఛరణలతో కృష్ణవేణికి నదిహారతి కార్యక్రమాన్ని అత్యంతవైభవంగా నిర్వహించారు. కార్యక్రమంలో ఏజేసీ వెంకట్రావ్, ట్రైనీ ఐఏఎస్ అనురాగ్, ఆలయకమిటీ చైర్మన్ కె.సిద్దయ్య, ఈఓ మృత్యుంజయశాస్త్రీ, పుష్కరఘాట్ల ఇన్‌చార్జులు వేణుగోపాల్‌రావు, నరోత్తమ రెడ్డి, తహసీల్దార్ గణేష్, భక్తులు అధికసంఖ్యలో పాల్గొన్నారు.

Source:http://www.namasthetelangaana.com/Districts/Nalgonda/%E0%B0%95%E0%B1%83%E0%B0%B7%E0%B1%8D%E0%B0%A3%E0%B0%B5%E0%B1%87%E0%B0%A3%E0%B0%BF%E0%B0%95%E0%B0%BF-%E0%B0%AA%E0%B0%82%E0%B0%9A%E0%B0%B9%E0%B0%BE%E0%B0%B0%E0%B0%A4%E0%B1%81%E0%B0%B2%E0%B1%81-22-598080.aspx

ఐదో రోజూ అదే జోరు…

-పుష్కర ఘాట్లలో జనసందడి
-స్నానమాచరించిన 3లక్షల మంది భక్తులు
నల్లగొండ ప్రతినిధి, నమస్తే తెలంగాణ:కృష్ణా పుష్కరోత్సవానికి అశేష జన ప్రవాహం కొనసాగుతోంది. పవిత్ర పుణ్య స్నానాలు, పెద్దలకు పిండ ప్రదానాలతో అన్ని ఘాట్లలో రద్దీ నెలకొంది. వేద పండితుల మంత్రోచ్ఛారణలతో నదీతీరం వేదంలా ఘోషిస్తోంది. ఐదో రోజు సుమారు 3లక్షల మంది పుష్కర స్నానాలు చేయగా.. నాగార్జునసాగర్‌లోనే ఈ సంఖ్య లక్ష ఉండడం విశేషం. వాడపల్లి, మట్టపల్లి, మహంకాళిగూడెం ఘాట్లు సైతం భక్తులతో కిటకిటలాడాయి. మరోవైపు సాగర్ బ్యాక్‌వాటర్ చెంత కాచరాజుపల్లిలో నిర్మించిన పుష్కర ఘాట్ నుంచి 2 కిలోమీటర్ల దూరంలో ఉన్న నదిలోకి నేటి నుంచి భక్తులను అనుమతించనున్నారు. ఇందుకోసం అక్కడ ప్రత్యేక భద్రతా ఏర్పాట్ల్లు చేపట్టారు.

కృష్ణాపుష్కరాల్లో భక్త జన హోరు కొనసాగుతోంది. మంగళవారం అయిదో రోజు జిల్లాలోని ప్రధాన పుష్కర ఘాట్ల వద్ద భక్తుల రద్దీ కొనసాగింది. జిల్లా వ్యాప్తంగా 28 పుష్కర ఘాట్లు ఏర్పాటు చేసిన సంగతి తెలిసిందే కాగా.. మంగళవారం ఉదయం మందకొడిగా ప్రారంభమైన భక్తుల రాక మధ్యాహ్నానికి ఊపందుకుంది. ఉదయం 11 గంటల నుంచి మధ్యాహ్నం 3 గంటల వరకు అన్ని ఘాట్ల వద్ద భక్తులు పుణ్య స్నానాలు, పిండ ప్రదానాలు కొనసాగాయి. సోమవారంతో పోల్చుకుంటే భక్తుల సంఖ్య తగ్గినప్పటికీ.. ఘాట్లు మాత్రం ఒక దశలో కిక్కిరిసిపోయాయి. సుదూర ప్రాంతాల నుంచి భక్తులు పుష్కర స్నానాల కోసం జిల్లాలోని ఘాట్లకు పోటెత్తారు.

షాద్ నగర్ ఎమ్మెల్యే జైపాల్‌యాదవ్, ఐపీఎస్ ఆఫీసర్ తరుణ్ జోషీ కుటుంబ సమేతంగా సాగర్‌లోని శివాలయం ఘాట్‌లో పుష్కర స్నానాలు ఆచరించారు. ఇప్పటి వరకు జల్లు స్నానాలకే పరిమితమైన కాచరాజుపల్లి ఘాట్‌లో నేటి నుంచి భక్తులు నేరుగా నదిలోనే స్నానం చేసే విధంగా అధికారులు ఏర్పాట్లు చేపట్టారు. ప్రస్తుత పుష్కర ఘాట్‌కు సుమారు 2 కిలోమీటర్ల దూరంలో ఉన్న నది చెంతకు ఇప్పటికే భక్తులు భారీ సంఖ్యలో వెళ్తుండగా.. నేటి నుంచి వారి కోసం ప్రత్యేక ఏర్పాట్లు చేపట్టి అనుమతించనున్నారు.

భక్త జన సాగరమే…
జిల్లా వ్యాప్తంగా మంగళవారం సుమారు 3 లక్షల మంది పుష్కర స్నానాలు చేశారు. సాయంత్రం 6 గంటల వరకు 2,24,972 మంది భక్తులు పుష్కర స్నానాలు చేసినట్లు అధికారులు వెల్లడించారు. కాగా.. ఆ తర్వాత రాత్రి పొద్దు పోయే వరకు వివిధ ఘాట్లలో మరో 50 వేల మంది పాల్గొని ఉంటారన్నది అంచనా. అయితే.. మంగళవారం కూడా ఎక్కువ మంది భక్తులు నాగార్జునసాగర్‌కే తరలి వ చ్చారు. శివాలయంతోపాటు సురికి వీరాంజనేయస్వామి ఘాట్‌లలో సుమారు లక్ష మంది భక్తులు పుణ్యస్నానాలు ఆచరించారు.

సాగర్ తర్వాత అత్యధిక మంది వాడపల్లికి పోటెత్తారు. ఇక్కడ సాయంత్రానికే సుమారు 50వేల మంది భక్తులు హాజరయ్యారు. తర్వాత మట్టపల్లితోపాటు నేరేడుచర్ల మండలం మహంకాళిగూడెం ఘాట్లకు భక్తుల రద్దీ ఎక్కువగా కొనసాగింది. నల్లగొండలోని పానగల్, దర్వేశిపురం ఘాట్లతోపాటు మేళ్లచెర్వు మండలంలోని వజినేపల్లి, కిష్టాపురం, బుగ్గమాదారం.. చందంపేట మండలంలోని కాచరాజుపల్లి, పెద్ద మునిగల్, పీఏపల్లి మండలంలోని అజ్మాపురం, పెద్దవూర మండలం ఉట్లపల్లి ఘాట్లకు ఓ మోస్తరుగా భక్తులు హాజరయ్యారు.

సాగర్‌లో కొనసాగుతున్న ట్రాఫిక్ ఆంక్షలు…
జిల్లాలోనే అన్ని ఘాట్ల కంటే ఎక్కువ మంది భక్తులు హాజరవుతున్న నాగార్జున సాగర్‌లో మాత్రం పోలీసుల ట్రాఫిక్ ఆంక్షలు ఇంకా కొనసాగుతూనే ఉన్నాయి. సాగర్‌లోని హిల్‌కాలని, పైలాన్ పార్కింగ్‌లు ఖాళీగా ఉంటున్నా భక్తుల సొంత వాహనాలను మాత్రం 10 కిలోమీటర్ల ముందే నిలిపేస్తున్నారు. ఇద్దరు మంత్రులు ఇంద్రకరణ్‌రెడ్డి, గుంటకండ్ల జగదీష్‌రెడ్డి మంగళవారం సాగర్‌కు వచ్చిన నేపథ్యంలో తమపై కొనసాగుతున్న ఆంక్షలను పలువురు మీడియా ప్రతినిధులు శివాలయం ఘాట్ వద్ద ఆందోళన చేపట్టి మంత్రుల దృష్టికి తీసుకెళ్లారు. జిల్లా మంత్రి జగదీష్‌రెడ్డి వెంటనే స్పందించి ఎస్పీ ప్రకాష్‌రెడ్డితో మాట్లాడి సమస్యలు పరిష్కరించాలని చెప్పారు. మంత్రి ఆదేశం మేరకు ఎస్పీ ఆదేశాలు జారీ చేసిన తర్వాత కూడా సాగర్‌లో మీడియా ప్రతినిధులపై ఆంక్షలు కొనసాగుతున్నాయని సాయంత్రం మరో దఫా ఆందోళన జరిగింది. ఇక సాధారణ భక్తులకు మాత్రం కొంత కూడా ఉపశమనం కలిగించే ఆంక్షలను ఇప్పటికీ పోలీసు శాఖ అమలు చేయకపోవడం గమనార్హం.

Source:http://www.namasthetelangaana.com/Districts/Nalgonda/%E0%B0%90%E0%B0%A6%E0%B1%8B-%E0%B0%B0%E0%B1%8B%E0%B0%9C%E0%B1%82-%E0%B0%85%E0%B0%A6%E0%B1%87-%E0%B0%9C%E0%B1%8B%E0%B0%B0%E0%B1%81-22-598090.aspx